الولا عبده جه.. لما «حاملي الموبايلات» بقوا بيجروا ورا الملياردير!.. بقلم: عبدالرحمن الحنوني

في زحمة «السوشيال ميديا» الرديئة، ما بقتش الكلمة الهادفة ولا رصانة الطرح هما اللي بيحركوا البوصلة، بقت اللقطة والتريند هي اللي بتشغل القطيع! المشهد بقى غريب ومبالغ فيه لأقصى درجة، ولسان حالهم بيعبر بقمة التهافت أول ما يظهر رجل الأعمال: «الولا عبده جه».. وهنا تلاقي قطيع «حاملي الموبايلات» بيجري وراه في كل مكان من قلب العزاء، طامعين في لقطة تريند أو ظهور رقمي، ليكون «الولا عبده» خير مثال ونموذج على هذا التكالب بعد ما جرفهم التيار وراء حمى الشهرة السريعة!

المأساة مش في وجود رجل أعمال بيحضر واجب عزاء أو بيتحرك بحراسة، المأساة في «الهواة» اللي شايلين تليفونات وبدون تنسيق واعي لحرمة الموقف وهيبته. واقفين يزاحمون الناس في سرادق العزاء، ويتحركوا وراه في كل خطوة بشكل عشوائي ومستفز، من غير مراعاة لخصوصية الحزن ومشاعر الحاضرين، وكأن صناعة المحتوى تخلت عن كل ذوق وبقت مجرد «تغطية مبالغ فيها» لمن هم تحت الأضواء الكثيفة!

والتسرع وصل لدرجة التنافس المفتوح؛ لو «عبده» قرر يدخل مكان خاص، هتلاقي البعض متزاحماً، ونازلين «بث مباشر» وتصوير لكل تفصيلة صغيرة وكبيرة. تبارٍ محموم وتنافس مفرط عشان يوثقوا كل تحرك، وكل ده طمعاً في التفاعل الرقمي ونظرة اهتمام، وضاربين بعرض الحائط قواعد اللياقة العامة والأصول المتعارف عليها بين الناس!

الظاهرة دي مش مجرد فوضى عابرة، دي حالة من «النهم الرقمي» اللي أثرت على المظهر العام للمجتمع، ولازم تقنينها وتنظيمها عشان ترجع للكلمة قيمتها وللأماكن العامة هيبتها، بعيداً عن الجري وراء التريندات السطحية على السوشيال ميديا!