معتمد جمال: أنا بتحمل مسؤولية التعادل وأنا بلتمس الاعزار للاعبين في ظل الإعداد المتاخر وبدون تدعيمات وأن شاء الله القادم افضل

كتب : محمد علي

صرح الكابتن معتمد جمال المدير الفني لنادي الزمالك في المؤتمر الصحفي عقب مباراة الاتحاد والتى انتهت بالتعادل السلبى بينهما :

أنا بشكر اللعيبة كلها على مجهودهم، وبشكر الجمهور اللي كان حاضر النهارده

و أنا عمري ما اشتكيت من أي حاجة، علشان كده بشكر كل اللعيبة على المجهود اللي عملوه النهارده، إحنا شغالين عكس أي منطق

وإحنا مطلوب مننا نكسب ونجهز اللعيبة في نفس الوقت، والمشوار لسه طويل

وأنا مش قادر أضغط على اللعيبة أكتر من كده، إحنا شغالين طول اليوم علشان نعد اللعيبة

وكان نفسي أخلص الماتش بدري علشان نقدر نهدي الدنيا الشوط الثاني، لكن للأسف محصلش، واللعيبة وقعت خلال الشوط وده طبيعي جدًا لأننا متأخرين في الإعداد .

ومش عايز أفقد أي لاعب في الأول وتحصل إصابات، فإحنا بنحاول نعمل توازن ما بين المباراة وتجهيز اللعيبة

وعن غياب خوان بيزيرا وهل الإدارة بتدعم معتمد جمال؟ أنا مش بتكلم غير في المباراة، وأنا مش هقدر أتكلم في أي شيء خارج المباراة

وأنا عاذر اللعيبة وملتمس ليهم العذر، وفي حاجات بتجبرنا نشوف شكل مختلف في الملعب. دي حاجات ممكن نعملها في آخر الدوري، أنا بقيت بعملها في بداية الدوري لأن الوضع معكوس والدنيا صعبة، لكن هنشتغل واحدة واحدة

ورداً على سؤال هل كلامك ده أعذار مقدمة للعيبة؟ لا، لا، ما تفهمش الكلام غلط. أنا بوضح الصورة، لأن عندنا مشاكل حقيقية، إحنا آخر فريق بدأ تدريبات في مصر، ده حتى دوري المحترفين بدأ قبلنا

و أنا مش بدي أعذار، لكن ده واقع. كل الفرق عملت تدعيمات كمان بصفقات كتيرة، وإحنا معملناش حاجة، وبداية متأخرة. أنا مش بقول كده علشان أقول اعذرونا

وإحنا عاملين بلان وخطة علشان اللي جاي لحد فترة التوقف، وبقول وبوضح إننا مطلوب مننا نلعب ونكسب ونجهز اللعيبة في نفس الوقت، وأنا بشارك الناس معايا

و أنا والله كان نفسي يبقى معايا النهارده أكثر من 8 تبديلات علشان مجيش على أي لاعب وأن شاء الله تعالى هنعمل كل حاجه في صالح الفريق الفتره الجايه .

 

About The Author