جزمة أبوك شيلها على راسك .. قبل الندم .. مهما حصل..؟ .. بقلم: أسامة عليوه

الاب هو السند والضهر هو العصب وجزمته اللي انت مكسوف تشيلها دلوقتي، هي اللي شالتك وانت صغير، وهي اللي مشيت بيها في الطين والحر والبرد عشان انت تمشي نضيف.جزمة أبوك لو شيلتها على راسك، راسك مش هتوطى .. راسك هتترفع.أبوك هو السند والضهر، هو العصب، هو الحيطة، هو العمود الفقري للبيت كله.
طول ما جزمته موجودة على الباب، انت قوي جدا، شجاع، مسنود، ولا يهمك حد في الدنيا.
بتدخل البيت تلاقيها، قلبك بيطمن، بتحس ان الدنيا لسه بخير.

لكن أول ما الجزمة دي تختفي من على الباب .. هتعرف ان ضهرك اتكسر.لما أبوك يموت هتنكسر.
هتمشي في الدنيا عريان، من غير ضهر، من غير سند، من غير حد يقولك “متخافش انا موجود“. هتدور على صوته في البيت مش هتلاقيه، هتدور على ريحته في هدومه، هتحضن المخدة بتاعته وتعيط زي العيال الصغيرين، بس بعد ايه؟ بعد ما فات الأوان.

صوت الاب في هو الميزان ولما يموت بتتفاجي بقلوب ذئاب مش بشر .. بتتفاجئ بناس اغراب عنك وكانوا منك ..هتتفاجئ بدنيا غداره وانت عايش في غابه …الحق أبوك قبل ما يموت.

اجبر بخاطره، ده كلمة حلوة منه بتشيل هم سنين، وانت بكلمة واحدة ممكن تموته وهو حي

اوعى تزعله، ده عاش حياته يطلع اللقمة من بقه ويديهالك. حرم نفسه هو وامك من انهم يروحوا يعملوا عمرة او يحجوا، عشان يجوزك انت واخواتك. حرم نفسه من هدوم جديدة، ومن أكلة حلوة، ومن فسحة، عشان انت تلبس وتاكل وتتفسح.أبوك شقي وبنى بيت، وفي البيت بنى لكل واحد فيكم شقة، ستركم كلكم، وفي الآخر ساب البيت كله لأولاده ونسوانهم، وراح قعد في عشة يكمل باقي حياته فيها.ساب الدنيا كلها ليكم، وخد هو حتة أوضة صغيرة، ومش بيشتكي.

بتدخل عليه تلاقيه قاعد لوحده، مستنيك تعدي عليه، مستني تليفون، مستني حد يقوله “انت عامل ايه يابا ..
متهملش أبوك وتنساه. قبل ما تجيب الفاكهة واللحمة ليك ولعيالك، عدي على أبوك، اديله تفاحة، صابع موز، حتة لحمة، مش عشان هو جعان، عشان هو محتاج يحس انه لسه ليه قيمة، انه لسه أب، انه لسه موجود.اسأل على أبوك من باب جبر الخواطر، ده جبر الخواطر عند ربنا كبير أبوك اللي تعب معاك من حقه ياكل من خيرك.
ده مش شحات بيشحت منك لا .. ده صاحب الخير كله.

انت ومالك لأبيك

الفلوس اللي في جيبك دي هو اللي عملها، والبيت اللي انت قاعد فيه هو اللي بناه، والاسم اللي انت ماشي بيه هو اسمه.هتندم .. والله هتندم… هتندم يوم ما تقف قدام قبره وتقوله “سامحني يا بابا“، وهو مش هيرد عليك.
هتندم يوم ما تتمنى تشوف جزمته على الباب تاني، ومش هتلاقيها. هتندم يوم ما تحتاج دعوة منه، وتلاقي الدنيا كلها قفلت في وشك. شيل جزمة أبوك على راسك دلوقتي، قبل ما تشيل نعشه على كتفك بعدين، وتقول ياريتني.

بوس ايد أبوك، بوس راسه، بوس رجله، قبل ما تبوس التراب اللي عليه.الأب لما يموت، البيت بيطفي، واللمة بتتفركش، والاخوات بيبعدوا عن بعض، والدنيا بتبقى غابة.الحق أبوك، ده اللي فاضل من عمره مش كتير، واللي فاضل من رضاه هو اللي هينجيك في الدنيا والآخرة. .. كلمات لابني قبل الآخرين .. هي كلمات للتاريخ

About The Author

abdelrhman lhanony

See author's posts